राप्रपाका सात संगठनका पदाधिकारी समायोजन

0

काठमाडौं-राष्ट्रिय प्रजातन्त्र पार्टीले विभिन्‍न सात संगठनका पदाधिकारी समायोजन गरेका छन् । राप्रपाका अध्यक्षत्रय कमल थापा, पशुपति शमशेर राणा र डा. प्रकाशचन्द्र लोहनीको बिहीबार बसेको बैठकले सो पार्टीसँग आवद्ध सात संगठनका पदाधिकारीको समायोजन गरेका हुन् ।जसअनुसार पार्टीको राष्ट्रिय प्रजातान्त्रिक महिला संगठनमा अध्यक्ष कुन्तीकुमारी शाही र सहअध्यक्षमा ममता राईलाई चयन गरिएको छ।

उनीहरुले पार्टीको राष्ट्रिय प्रजातान्त्रिक युवक संगठनमा अध्यक्षद्वय प्रकाश रिमाल र राजु लोहनी चयन गरेका छन्।राष्ट्रिय प्रजातान्त्रिक बिद्यार्थी संगठनमा कार्यकारी अध्यक्ष महेशबहादुर सिंह र अध्यक्ष धनशुर शाहीलाई चयन गरिएको राप्रपा नेता मोहन श्रेष्ठले जनाएका छन्। राष्ट्रिय प्रजातान्त्रिक उत्पीडित उत्थान संगठनमा ऋषिबाबु परियारलाई अध्यक्ष र सरला बिश्वकर्मालाई सहअध्यक्ष बनाइएको छ।

त्यसैगरी, राष्ट्रिय प्रजातान्त्रिक मुस्लिम संगठनको अध्यक्षमा सलाउद्दिन जसगढ र सहअध्यक्षमा हजबुल मियाँ चयन भएका छन् । राष्ट्रिय प्रजातान्त्रिक आदिवासी जनजाति संगठनमा लालध्वज लामा र आङ्गनिमा शेर्पा अध्यक्ष रहेका छन्।